¿Cuála ye?
¿Cuála ye? El xuegu de preguntes d'Asturies ye un xuegu de mesa de la mesma categoría que'l Trivial o Preguntados. Nel desarrollu del xuegu nel tableru y a lo llargu de cientos de preguntes en 6 temátiques diferentes, puedes poner a preba los tos conocimientos sobre Asturies en tolos ámbetos.
Tolos idiomes tienen el so xuegu y agora tócanos a nós, los y les asturianes, facer el nuestru ¿ayúdesnos?
Queremos facer un xuegu de conocimientu qu'empodere Asturies, la nuestra historia, cultura, llingua, sociedá, el nuestru mediu natural. Un xuegu qu'al empar de pa divertise valga pa deprender y divulgar tola riqueza d'Asturies. Les 6 estayes del xuegu son: Historia, Cultura, Llingua y Lliteratura, Xeografía y Conceyos, Ciencia y Naturaleza y Deportes y Entretenimientu.
¿Quién collabora con Acuto pa facer el xuegu?
Quisimos cuntar con persones con fondos conocimientos en dellos ámbetos sobre Asturies. Collaboren nes preguntes: Bertu Ordiales, biólogu y escritor, autor de llibros sobre naturaleza asturiana; Bertu Peña, etnógrafu, illustrador ya historiador, autor d'incontables estudios y llibros sobre la cultura asturiana; Dani García de la Cuesta, músicu ya investigador de la música asturiana; Laura Marcos, profesora, escritora y crítica lliteraria; Julio González Trabanco, filólogu y llibreru; Rafa R. Valdés, historiador, investigador y especialista en llingua asturiana; Rubén Magadán Cosío, historiador ya investigador; Victor Suárez, profesor y activista, ún de los que puxa pola Wikipedia n'asturianu; SEMA, Sociedá Etnomotora Asturiana, entidá que tien estudiao con fondura'l xuegu y deporte asturianu.
¿Imaxines tener tol conocimientu d'estes persones nun xuegu de preguntes sobre Asturies?
¿Qué ye Acuto Xuegos?
Acuto Xuegos ye una iniciativa qu'entamó n'abril de 2019 pa la creación de xuegos y xuguetes n'asturianu. Dende entós a güei tenemos espublizaos 4 xuegos n'asturianu, dos d'ellos agotaos, unu n'eonaviegu y otru, a traviés d'otra campaña de mecenalgu, en gallegu.
¿Cómo ye'l xuegu? El xuegu base tien:
Tableru de xuegu de 48x48 cm
600 preguntes en 100 tarxetes, ¡pero queremos que seyan más si va bien la campaña!
24 fiches d'aciertu
Dau y peones de xugadores
¿A qué vamos dedicar la recaudación?
Cola recaudación del Crowdfunding financiamos solo en parte la edición y publicación del xuegu, queremos cubrir un 70% de los costes del xuegu, amás hai que sumar los gastos d'unvíu en correos o los de recoyida nes tiendes y la comisión de Verkami por usar la so plataforma, que supera'l 8%.
¿Cómo y cuándo ye la entrega?
Puedes escoyer ente dos tipos d'entrega: con recoyida o con unvíu a domiciliu dientro de península. Queremos facilitar la entrega y qu'aforréis los gastos d'unvíu, si quies puedes recoyer el vuestru ¿Cuála ye? en Llibrería Trabe d'Uviéu, Llibrería La Buena Letra de Xixón, Olmar Regalos d'Avilés, Xuguetería Decalupa de Mieres, Xuguetería Muniama de Cagues, Xuguetería La Jirafa de Ribeseya y Copistería La Semeya de Noreña.
Pa otros unvíos a fuera de la península dexa un comentariu o mándanos un mensaxe.
Si sal alantre la campaña, el xuegu entregarémoslo ente ochobre y payares d'esti añu.
+ Info
Facebook: Acuto Xuegos
Instagram: @acuto_xuegos
Twitter: @AcutoX
Gmail: [email protected]
14 comentarios
Si ya eres mecenas, Inicia sesión para comentar.
Acuto Xuegos
Autor/a
Gracies María, queda apuntáu. Cuando fine la campaña va pasase un cuestionariu a los mecenes pa pidir los sos datos :)
María EM
Prestaríanos apaecer como mecenes d'esta manera: María E. Marqués y Rafa R. Valdés.
Acuto Xuegos
Autor/a
Munches gracies Manolín! Apuntámos lo que nos dices :)
Manolín d'El Xastre
¡Norabona pola iniciativa! Nun taría mal poder tener tamién una versión na variante oucidental del asturianu, d'ésti ya d'outros proyeutos.
Acuto Xuegos
Autor/a
Gracies Pachi, gracies Belar!
Valoramos tolo que nos comentes Belar, y vimos meyor facelo d'esta. Ya desplicaremos más nel desdendolcu de la campaña ;)
Belar
Cómo nun escoyistis la pallabra entruga? Dába-y más personalidá, y amás ye la preferencial del DALLA. Prestaba tamién que foren entrugues xenériques y non solo d'Asturies. Pero bono, siempres habrá tiempu pa ediciones nueves si tien éxitu'l proyeutu. P'alantre!
Francisco Gutierrez Fernandez (Pachi)
Anímosvos a participar nesti proyeutu
Acuto Xuegos
Autor/a
Munches gracies Maria Luz y gracies a ti Paz! :)
Maria Luz Santos
Ánimu y p’alantre
Paz García
Gracies